वकिलीबरोबरच त्यांनी लेखनाच्या क्षेत्रातही भरीव कार्य केले आहे. हैदराबाद स्वातंत्र्यलढ्यावर आधारित ‘कर्मयोगी संन्यासी’ हे त्यांचे पुस्तक स्वामी रामानंद तीर्थांचे अधिकृत चरित्र समजले जाते. भारतीय स्वातंत्र्यलढ्यात ज्यांनी अतिशय मौलिक कार्य केले त्यांच्या कार्याचा परिचय करून देण्याच्या हेतूने त्यांनी सप्रमाण लेखन करून नेहरू, पटेल, राजाजी, राजेंद्रप्रसाद, सुभाषचंद्र बोस इत्यादींवर त्यांनी ‘त्यांना समजून घेताना’ हे पुस्तक लिहिले. पंडित नेहरू यांच्यावर लिहिलेले त्यांचे पुस्तक येऊ घातले आहे. वैचारिक व अतिशय वाचनीय लेखन, सोपी पण अर्थसमृद्ध शैली ही त्यांच्या लेखनाची वैशिष्ट्ये आहेत. त्यांचे लेखन कधीही सत्याला सोडून दिसत नाही. अशा या लेखनाचे सांस्कृतिक आणि ऐतिहासिक मोल फार मोठे आहे.