धागेदोरे शोधत लेखकानं वस्त्रांच्या इतिहास आणि वर्तमानाचा धांडोळा या ग्रंथात घेतला आहे. साहित्यिक साधनांवर न थांबता लेखकानं चित्रं, मूर्ती आणि कारागिरांसोबत राहून आणि त्यांच्यासोबत विनम्रपणे संवाद साधून वस्त्रांच्या निर्मिती आणि वितरणाचाही सांस्कृतिक अभ्यास वाचकांसमोर मांडला आहे.
खास दखनी वस्त्रसंस्कृतीवरचं तपशीलवार, ससंदर्भ असं व्यापक भान असणारं पुस्तक हे या अभ्यासाचं एक फलित असलं तरी दुसरं व्यावहारिक फलित म्हणजे लेखकानं जवळपास नामशेष झालेल्या काही वस्त्रांचं ज्ञान असणाऱ्या संबंधित कारागिरांकडून त्या त्या प्रकारच्या वस्त्रांची पुन्हा निर्मिती करून एका अर्थी वस्त्रसंस्कृतीचं पुनरुज्जीवन केलं आहे. पुढे काही जुन्या पारंपरिक वस्त्रांच्या सोबत या पुनर्निर्मित वस्त्रांचं प्रदर्शन पुण्यातील खासगी संग्रहालयात करून त्यांनी या action research म्हणता येईल अशा कामाची सांगता केली आहे.
या पुस्तकात वस्त्रसंस्कृतीसारख्या ललितेतर आणि दृश्य विषयाची मांडणी उच्च निर्मितीमूल्यं सांभाळून केलेली आहे. त्यामुळे चंद्रकळेपासून ते पंचापर्यंतच्या वस्त्रप्रावरणांचे, कारागिरांचे उत्तम फोटो आणि वस्रांच्या निर्मिती आणि आविष्कारासंबंधीची मराठा चित्रशैलीचा वापर करून काढलेली चित्रं देखणी तर आहेतच, पण लेखकानं मांडलेल्या विचाराला पूरक आहेत. विकास गायतोंडे या जाहिरातक्षेत्रात आंतरराष्ट्रीय स्तरावर नावाजलेल्या तज्ञांनी पुस्तकाचं आरेखन केलं आहे. विनय नारकर यांनी आपल्या एकूण कारकीर्दीचं सार या पुस्तकामधून कथन केलं आहे असं म्हणता येईल.